Тараз қалалық Қоғамдық кеңес облыс орталығындағы азық-түлік бағасын тұрақтандыру шаралары көңіл көншітерлік емес деген баға берді.

---

Қоғамдық кеңес ағымдағы жылдың сәуір-мамыр айларында халық көп тұтынатын азық-түлік түрлерінің баға тенденциясына, сондай-ақ «Тараз» әлеуметтік-кәсіпкерлік корпорациясы» АҚ-ның бағаны тұрақтандыру жұмыстарына зерделеу жұмыстарын ұйымдастырған болатын.

Нәтижесінде, жетістіктермен қатар, көптеген кемшіліктердің де беті ашылды.  

Негізгілеріне тоқталсақ, олар:

• Тікелей өндірушіден жеткізілуі тиіс көкөністердің көлеміне (тоннажына) оларды өсіру жер телімдері аумағының сәйкессіздігі, әрі жер телімдерінің өндірушілерге тиесілілігін дәлелдейтін құжаттардың кәсіпкерлер тарапынан ұсынылмауы;
• Қордағы көкөністер мен оларды сақтау қоймаларының ӘКК-ның жауапты мамандары тарапынан  көрсетілмеуі;
• Әлеуметтік дүкендердегі көкөністер сапасының сын көтермеуі;
• «Социальные павильоны» ЖШС-не әлеуметтік дүкендерді маңызды азық-түлікпен қамтамасыз етуге қарызға берілген қаражаттың толыққанды қайтарылмауына қарамастан, аталмыш ЖШС-ті қаржыландырудың әлі күнге жалғасып келе жатқандығы;
• Кейбір әлеуметтік дүкендердің ауқымының тарлығы, сатушылар мен тұтынушылар үшін қолайсыздығы;
• Әлеуметтік маңызды тауарлар тізбесіндегі 19 түрлі азық-түліктің бірқатарының тікелей өндірушілерден жеткізілмеуі, жолға қойылмағандығы;
• Баға мониторингін жүргізудің нақты методикасының болмауы.

Осы және өзге де сын-пікірлер Тараз қалалық Қоғамдық кеңестің кеңейтілген отырысында айтылып, жауапты мекемелердің қызметі көңіл-көншітерлік жағдайда емес деген баға берілді. 

Жиын қорытындысы бойынша кемшіліктерді түзеу бойынша Қоғамдық кеңес тарапынан ұсынымдар берілді.