Түркістан облыстық Қоғамдық кеңесінің кезекті  отырысы өтті

---

Жиынға облыстық мәслихаттың төрағасы Н.Әбішов, ҚР Сыбайлас жемқорлыққа қарсы іс-қимыл Агенттігінің Түркістан облысы бойынша департаментінің Превенция басқармасының басшысы Е. Жүнісов, басқарма басшыларымен БАҚ өкілдері қатысты.

Кеңес отырысын облыстық кеңес төрағасы Б.Жылқышиев ашып, жүргізіп отырды.

Күн тіртібіндегі облыстың 2022 жылғы бюджетінің орындалуы жөнінде және сыбайлас жемқорлыққа қарсы іс-қимылды жүзеге асыру бойынша кейбір басқарма басшыларының ақпараттары  тыңдалды.

Түркістан облыстық қаржы және мемлекеттік активтер басқармасының басшысы А.Тасыбаев 2022 жылғы облыстық бюджеттің орындалуы бойынша жан-жақты есепті жасап берді. Облыстық Қоғамдық кеңесінің бюджет және экономикалық дамуы жөніндегі комиссия төрағасы Б.Жақыпов  қосымша баяндама жасап, басқарма тарапынан орын алған кемшіліктерді атап өтті. Одан басқа Қоғамдық кеңес мүшелері тарапынан да пікір ұсыныстар айтылды.

Отырыстың күн тәртібіндегі екінші мәселесі бойынша облыстық мемлекеттік сатып алу басқармасының басшысы Қ.Елібаев сыбайлас жемқорлыққа  қарсы іс қимылды жүзеге асыру бойынша атқарылған жұмыстары туралы баяндама жасады.

Бұл мәселені талқылау барысында Сыбайлас жемқорлыққа қарсы іс-қимыл Агенттігінің Түркістан облысы бойынша департаментінің Превенция басқармасының басшысы Е.Жүнісов және Қоғамдық кеңестің тиісті  комиссиясының төрағасы У.Қайназаров басқарма  тарапынан жіберілген кемшіліктерге назар аударып, бірқатар ұсынымдармен ұсыныстар берді.

Сонымен қатар кеңесте: -  «Облыс әкімдігінің кейбір қаулылардың күші жойылды деп тану туралы» Түркістан облысы әкімдігінің қаулы жобасы;

 «Мемлекеттік мекеме құру туралы» Түркістан облысы әкімдігінің қаулы жобасы;

«2023-2024 оқу жылына техникалық және кәсіптік, орта білімнен кейінгі білімі бар кадрларды даярлауға арналған мемлекеттік білім беру тапсырысын бекіту туралы» Түркістан облысы әкімдігінің қаулы жобасы;

 «Түркістан облысы әкімдігінің 2019 жылғы 27 қарашадағы №264 «Түркістан облысы бойынша кен іздеушілікке арналған аумақтарды айқындау туралы» қаулысына өзгеріс енгізу туралы» Түркістан облысы әкімдігінің қаулы жобаларын қарап, тиісті келісімдерін берді.