Халықтың көкейтесті мәселелері- Қоғамдық кеңестің басты назарында!

---

Атырау Облыстық Қоғамдық Кеңестің төрағасы М.Ізбасов және кеңес жанындағы Сыбайлас жемқорлыққа қарсы  қоғамдық бақылау, құқық қорғау жөніндегі комиссия  мүшелері Атырау облыстық полиция Департаментінің басшылығымен кездесті.

Комиссия мүшелері облыстағы қылмыстылық ахуалымен танысып, тұрғындарды толғандырған сұрақтарды жеткізді.

Комиссия төрағасы А.Иманғалиев қаладағы кейбір көшелерде жаяу жүргіншілердің қауіпсіздігі сақталмайтындықтан, жол белгілерін қою керектігі туралы ұсыныстарын білдірді. Ұсыныс полиция басшылығымен қабылданып, проблемалық учаскелерге жол белгілері орнатылатынын айтып жеткізді.

Комиссия мүшесі С.Ускембаев Сағыз ауылында соңғы 10 жыл ішінде 9 қасақана адам өлтіру қылмысы орын алғанын, бұл шағын ауыл үшін өте қайғылы ахуал болып саналатынын айтты.

Департамент басшысы Н.Оразбаев Қызылқоға ауданындағы қылмыстылықты төмендету үшін жергілікті атқарушы органмен бірлесе отырып, кең көлемде іс-шаралар жоспары жасақталғанын айтты, оның аясында ауыл тұрғындарымен идеологиялық жұмыстарды күшейту, Сағыз ауылының барлық көшелеріне бейнебақылау камераларын орнату, полицияның қоғамдық көмекшілерінің штатын ұлғайту, сондай-ақ, жергілікті учаскелік полиция инспекторларының тұрмыстық жағдайын жақсарту шаралары да енгізілген, бүгінгі күнгі полиция ғимараты деуге де келмейтін бір-екі бөлмелік кеңсеге жөндеу жүргізіп, ұлғайтып салып, полицияға жағдай жасау қарастырылған.

Комиссия мүшесі С.Рахимова қылмыстың ашылуы тұрғындарды қанағаттандырып отырмағанын, әсіресе, ұрлық, алаяқтық қылмыстарының ашылу деңгейінің төмендігін, сондай-ақ, жол-көлік оқиғаларының 20 %-ға, жарақаттанғандар санының 23 %-ға, ал жол апатынан қайтыс болғандар санының 50%-ға  өсіп кеткенін баса айтып, жол көлік оқиғаларының алдын алудағы полиция жұмысының сын көтермей отырғанын жеткізді және ірі қара малдың қатысуымен орын алатын жол-көлік оқиғаларын болдырмау мақсатында трасса жолдарының жанына электр желілері бар сымдарды тартуды қарастыруды сұрады.

Полиция басшылығы алаяқтықтың ашылу көрсеткішінің өте төмен екенін айта келіп, өкінішке орай,  интернет алаяқтықтың күшейіп отырғаны, жәбірленушілерден алдап алған ақшаларды интернет алаяқтардың бірден киви-әмиянға аударып жіберіп, қаржылық бақылау аясынан шығып кететіндігі қиындық туғызып отырғанын көрсетті. Департамент басшылығы сол сияқты, жол-көлік оқиғаларын азайту мақсатында трасса жолдарын кеңейтіп бір бағыттық жол ету жоспарланып отырғанын айтты және электр сымдарын тарту жөніндегі ұсынысты да қабылдап, әкімдікпен бірлесе отырып іске асыруға мүдделі екенін жеткізді.

Жалпы, Қоғамдық Кеңестің жанындағы құқық қорғау органдарымен байланыс орнату жүктелген осы комиссия мүшелері полиция органдарына тұрғындармен ашықтықты жолға қою, тергеушілердің жәбірленушілермен кері байланысты қамтамасыз етіп, оларға қылмыстық іс бойынша ақпараттардың тиісті мерзімінде беріліп отыруын қамтамасыз ету, қылмыстардың ашылу деңгейін көтеру туралы ұсыныстарын жеткізді.

Атырау облыстық Қоғамдық кеңесі