Қоғамдық бақылау

---

Бүгін қоғамдық кеңес мүшелері мен депутаттар қаланы абаттандыру және санитариялық тазарту мәселелері бойынша рейдтерді жалғастырды. Рейдтік ісшаралар қаладағы қатты тұрмыстық қалдықтарды шығару мәселесінің өзектілігін тағы да көрсетті. «Сәт Тазалық» ЖШС қарасты № 2 ТҚЦ бастығы Н.Т.Өміралинаның кәсіпорын тарапынан қоқыс шығару кестесінің сақталатындығы жөніндегі уәждеріне қарамастан, рейд барысында Ерден, 41, 183,185 мекенжайлары бойынша контейнерлік алаңдардан қоқыс шығарылмағандығы анықталды, тұрмыстық қалдық жинақтауға арналған орындарға ірі көлемді және құрылыс қалдықтары, ағаш бұтақтары тасталған.

Сонымен қатар бүгінгі рейдте мердігер ұйым «Ерстрой» ЖШС басшысы Ж.Е.Ибадилдинның қатысуымен автобус аялдамаларын күтіп ұстау жағдайы да тексерілді. Қалада 53 аялдама бар, барлық аялдамалардың әйнектері сынған, ауыстыруды қажет етеді. Осы орайда вандалдар кім деген сұрақ туындайды.

Құрметті қала тұрғындары! Тұрғын үй-коммуналдық шаруашылық мәселелері бойынша ағымдағы жылдың 27 сәуіріне жоспарланған мүдделі тараптардың қатысуымен өтетін кеңейтілген отырыс 2 мамырға ауыстырылады. Сіздерден азаматтық белсенділік танытуларыңызды, абаттандыру ережелерін сақтауларыңызды, қоқысты арнайы белгіленген орындарға шығаруларыңызды, абаттандыру элементтеріне ұқыпты қарауларыңызды және айналаңыздағыларды тәртіпке шақыруларыңызды сұраймыз.