Кезектен тыс отырыс өткізілді.

     4 қараша 2025 жылы Зайсан аудандық қоғамдық кеңесінің кезектен тыс отырысы болды. Отырыстың күн тәртібінде қазіргі уақытта қоғамдық пікір тудырып отырған аудан тұрғындардарын көмірмен қамтамасыз ету, жалпы ауданның  тұрғындарын келешекте  сапалы көмірмен, табиғи газбен жыл сайын ешқандай дабырасыз қамтамасыз етіп, қыстамаға алаңсыз кіруге алғы шарттар жасау мәселесі көтерілді.
      Отырысқа аудан әкімінің орынбасарлары, ауылдық округ әкімдері, сондай ақ  «Зайсан Таза су» мекемесінің, көмір өндіруші мекемесінің, көмір тасымалдаушылардың өкілдері, аудандық Достық газетінің редакторы Н.Халықова  отырысқа шақырумен қатысты.  
    Қоғамдық кеңес төрағасы М.Уәли отырысты ашып, биылғы жылы қыстамаға дайындық мәселесі аудандық Қоғамдық кеңес отырысында екі рет қаралып, тиісті жауапты адамдарға нақтылы ұсыныстар берілсе де, қазіргі уақытта аудан тұрғындарын көмірмен қамтамасыз ету жағдайы алаңдатарлық жағдайда екендігін, әлеуметтік желілерде бұл мәселе өткір көтеріліп жатқандығын айтып өтті. Сондықтан мәселенің мән жайын толық зерделеу үшін бүгінгі қоғамдық кеңес отырысы кезектен тыс шақырылып отырғанын жеткізді.   Күн тәртібіндегі мәселе бойынша бірінші  аудан әкімінің орынбасары А.Утебаев аудан тұғындарын көмірмен қамтамасыз етудің қазіргі уақыттағы жағдайы туралы хабарлама жасады. Ол хабарламасында биылғы жылы көмір өндіру мәселесі қайшылықтармен түрлі кедергілермен жүргізілгенін айтып өтті. 15 қазаннан бастап көмір тасыла бастағанын, басында  көмірдің сапасыз болғандығын, қазір жұмыстың жолға қойылғанын, сапалы көмір шыға бастағанын, алдағы уақытта аудан тұрғындарын жергілікті көмірмен қамтамасыз ету жақсаратынын айтты. Алдағы уақытта күніне 120-150 тн көмір тасылады деп жоспарлап отырғанын, сондай ақ басқа жақтан көмір тасу мәселесін қарастырып жатқандарын жеткізді. 
    Қоғамдық кеңес мүшелері жергілікті жерде өндіріліп жатқан көмірдің өндіру және тасымалдау құнының жоғарғы екендігін, ең бастысы көмірдің сапасы төмен екендігін айтып осы бағытта жұмыстарды жақсарту жөнінде өз ұсыныстарын айтты.Сондай ақ қосымша Қаражырадан да көмір тасуға  қала және ауыл округ әкімдерімен  бірлесе отырып барлық мүмкіндіктерді қарастыру ұсынылды.
Екінші сөз алған көмір өндіруші мекемесінің  өкілі Ж.Нұрмуханбетов көмір өндіру жұмыстарымен нақтылы тамыз айынан рұқсат алғаннан кейін  бастағандарын, карьерді қалпына келтіру өте қиындықпен жүргізілгенін, алдыңғы көмір өндіруші мекеме карьерде көмір өндіру жұмыстарының технологиясын бұзып, карьерде сапалы көмір өндіруге үлкен кедергілер жасап кеткенін айтып өтті. Соған қарамастан уақытпен санаспай жұмыс істеп карьерді қалпына келтіргендерін, жаңа қуатты техникалар әкеліп жатқандарын,  отыз адамды жұмыспен қамтамасыз етіп отырғандарын әзірге шығынмен жұмыс істеп отырғандықтан оларға еңбек ақы төлеу қиындықпен  жүргізіліп жатқандығын айтып өтті. Қазіргі уақытта жұмыс бір жолға қойылғанын  аудан тұрғындарын сапалы көмірмен қамтамасыз ете бастағандарын алдағы уақытта жұмыстарын одан әрі жақсартатындарын жеткізді. Көмірдің сату бағасы  көмірдің өзіндік құнынан  аз екендігін әзірге шығынмен жұмыс істеп жатқандарын сондықтан осы бағамен сатылатынын түсіністікпен қабылдауды сұрады. Қыс кезінде жоғарғы қоймаға жол болмай қалғанда күні бұрын көмір жинақталған төменгі қоймадан көмір босатылатынын айтты. Аудандағы аз қамтылған жанұяларға  мүмкіндігінше көмірмен көмек беру жағдайларын қарастырып жатқандарын жеткізді.  Қоғамдық кеңес мүшелері  тарапынан сұрақтар қойылып жауаптар қайтарылды.
    Көмір тасымалдаушы А.Молдақашова сөз алып көмірге барып қайтудың тау жолының қиындығын, көмір түсіруге адам жалдап, оған әр тасымалға            15 мың теңге ақы төлейтінін,  жанар май , қосалқы бөлшектер қымбаттап кеткендігін айтып, тау жолына бастарын бәйгеге тігіп көмірге баратын жүргізушілердің аз екендігін айтып көмірдің әр тоннасын 30-32 мыңнан сатып жүргендерін жеткізді. 
    Отырыста ауыл округ әкімдері де өз пікірлерін білдіріп өз округтерінің тұрғындарын көмірмен қамтамасыз ету жөнінде жұмыс істеп жатқандарын, алдағы уақытта да осы бағытта жұмыстарын жалғастыратындарын жеткізді. Жаңағы жасаған ақпарат бойынша әсіресе  Шілікті, Біржан ауылдық округтер бойынша түскен көмір бір үйге бір тоннадан көмір айналмайды ғой деген кеңес мүшелерінің сұрақтарына, тиісті ауыл  әкімдері әр үйде көктемнен қалған көмірлері, тұрғындардың әртүрлі жолмен өздері түсірген көмірлері бар екендігін жалпы әр үйде алғашқы кезде жағатын кем дегенде 1-2 тоннадан көмірлері бар екенін айтты.  Кеңсай ауылының әкім А.Смаиылов ауыл тұрғындары көмір сапалы болса да 1-2 тоннадан ғана көмір алып отырғандарына өзінің түсінбестігін білдірді.
    Қоғамдық кеңес мүшелері   әкімдерге ауылдың әрбір жанұясымен жұмыс істеуді, әсіресе аз қамтылған отбасыларға  көмір сатып алуға кәсіпкерлер тарапынан әтүрлі көмектер ұйымдастыру, бір жолғы әлеуметтік көмек беру жолдарын қарастыруды ұсынды. Кейбір  ауылда көмір тапшылығы сезілсе жасырмай дер кезінде аудан басшылығына жеткізіп отыруды,  аудан басшылығы тарапынан тиісті шаралар қолданылатынын жеткізді. «Достық» газетінің редакторы Н.Халықова ханым сөз алып ауданда  көмір мәселесі төңірегінде әр түрлі пікірлер айтылып жатқандығын, бірақ оған түсінікті жауап берілмейтінін, идеологиялық жұмыс жеткіліксіз екендігін, келешекте барлық түйткілді жағдайларға халыққа түсінікті етіп жиі жиі ақпараттар жеткізіліп тұруы  қажет екендігін айтты.
   Отырысты Қоғамдық кеңес төрағасы М.Уәли  қортындылап, аудан тұрғындарын қыстан қысылмай шығуына барлық жағдайлар жасалатынын, көмірді арзандату жолдарын қарастыруды, қыстамаға дайындық бойынша ауданда құрылған штабтың жұмысын жандандыруды, ауданның әрбір тұрғынының көмірмен қамтамасыз ету жағдайын бақылауда ұстауды қала және ауылдық округ әкімдеріне оған қоғамдық бақылау жасауды қоғамдық кеңес мүшелеріне тапсырды.
Аудан тұрғындарын табиғи газбен қамтамасыз ету мәселесі  қоғамдық кеңестің келесі отырысында қаралатын болды.
   Аудандық Қоғамдық кеңестің ақпарат орталығы.

Фото

Previous Next