Қазкеңес жаңалықтары

ҚОҒАМДЫҚ МОНИТОРИНГ

Қазақстан Республикасында дәрілік заттарға баға белгілеу тетігін жетілдіру аясында ҚР Денсаулық сақтау министрлігі тарапынан бірқатар жүйелі шаралар қабылданып, халық үшін дәрілік заттардың экономикалық қолжетімділігін арттыруға бағытталған жұмыстар жүргізілуде. 

Атап айтқанда, дәрі-дәрмектердің 2900 сауда атауына бағалар қайта қаралып, жаңа шекті бағалар бекітілді. Қазіргі уақытта қоғамда азық-түліктен кейін дәрі-дәрмек бағасы өзекті мәселелердің біріне айналып отыр. Дәрі-дәрмек бағасының негізсіз өсуіне жол бермеу мақсатында Үкімет тарапынан түрлі шаралар іске асырылуда. 

Солардың бірі – дәрі-дәрмектердің 2900 түріне көтерме және бөлшек саудада белгіленген шекті бағалардан асырмай сату жөніндегі ҚР Денсаулық сақтау министрінің 2025 жылғы 18 шілдедегі №470 бұйрығының қабылданып, қолданысқа енгізілуі. Аталған бұйрыққа енгізілген дәрілік заттар қазіргі уақытта ауданымыздағы дәріханаларда белгіленген шекті бағадан асырмай сатылуы тиіс. 

Осы бағалардың сақталуын бақылау, сондай-ақ аудан халқының дәрі-дәрмекпен қамтамасыз етілу жағдайын зерделеу мақсатында аудандық Қоғамдық кеңестің төрағасы Ж. Дауталиевтің бастамасымен Қоғамдық кеңес мүшелерінен арнайы жұмыс тобы құрылды. Жұмыс тобының құрамына Қоғамдық кеңес төрағасы Ж. Дауталиев, кеңес мүшелері А. Доспаева, С. Базарбаев және кеңес хатшысы Ж. Қамалғалиева енді. 

Аталған жұмыс тобы Индербор кентіндегі «Arzan Pharm», кәсіпкер А. Исалиеваның «Елнұр» дәріханасы және өзге де дәріхана нүктелеріне, кәсіпкер Исалиев Арманның дәріханаларына алдын ала ескерту хаттарын жолдап, 19–20 қаңтар күндері қоғамдық бақылау жүргізді. 

«Arzan Pharm», кәсіпкер А. Исалиеваның «Елнұр» дәріханасы және өзге де дәріхана нүктелеріне жүргізілген Қоғамдық бақылау барысында дәрі-дәрмектердің бөлшек сауда бағалары негізінен бұйрықта бекітілген шекті бағаларға сәйкес екендігі анықталды. Сонымен қатар, 2025 жылғы 18 шілдеге дейін әкелінген дәрілік заттар бұрын қолданыста болған нормативтік құқықтық актілерге сәйкес қалыптасқан бағаларымен сатылып жатқаны белгілі болды. 

Мәселен, «Диклофенак Teva» дәрілік затының жаңа заңнамаға сәйкес белгіленген шекті бағасы 2801,86 теңгені құрайды. Алайда аталған күнге дейін жеткізілген бұл өнім бұрын қолданыста болған заңнама талаптарына сәйкес жоғары бағамен сатып алынғандықтан, ол бұрын бекітілген шекті баға шеңберінде сатылуда. 

Сонымен қатар, 19–20 қаңтар күндері қоғамдық бақылау жүргізілетіні туралы алдын ала ескерту хаты берілгеніне қарамастан, кәсіпкер Исалиев Арманға тиесілі Б. Майдыров көшесі, 1а мекенжайында орналасқан дәріхана жабық күйде болды. Тұрғындардың айтуынша, аталған дәріханада тауар сатып алу барысында фискалдық чек берілмейді, ал төлем қолма-қол ақша немесе мобильді аударым арқылы қабылданады.

Дәрілік заттардың бағасын бақылау бір реттік қоғамдық бақылаумен шектелмейді. Алдағы уақытта аудандық Қоғамдық кеңес тарапынан жыл көлемінде жоспарлы түрде қоғамдық мониторингтер жүргізу көзделіп отыр. 

Сонымен қатар, дәрі-дәрмек бағасына қоғамдық бақылауды күшейтуде аудан тұрғындарының белсенділігі ерекше маңызды. Осыған байланысты, әрбір азамат дәріханадан дәрілік зат сатып алғаннан кейін міндетті түрде фискалдық чек талап етіп, онда көрсетілген бағаны интернет желісі арқылы Dari.kz мобильді қосымшасына кіріп, бекітілген шекті бағалардан аспағанын тексеріп отыруы қажет. 

Баға талаптарының сақталмауы немесе өзге де заңбұзушылықтар анықталған жағдайда, аудандық Қоғамдық кеңеске немесе тиісті мемлекеттік органдарға хабарласу мүмкіндігі бар.

Фото